ᠤᠮᠳᠠᠭᠠᠶᠢᠯᠠᠵᠤ ᠪᠤᠯᠤᠰᠢ ᠦᠭᠡᠢ ᠠᠰᠠᠭᠤᠵᠣ ᠰᠢᠨᠵᠢᠯᠡᠬᠦ ᠶᠢᠨ ᠲᠤᠬᠠᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/2/11
     ᠮᠤᠩᠭᠤᠯ᠂ ᠲᠦᠪᠡᠳ᠂ ᠬᠢᠳᠠᠳ ᠭᠡᠰᠡᠨ ᠦᠭᠡᠢ ᠡᠪᠡᠳᠴᠢᠨ ᠤᠨᠤᠰᠢᠯᠠᠨ ᠵᠠᠰᠠᠬᠤ ᠳᠤ ᠪᠦᠷ ᠯᠠ ᠠᠰᠠᠭᠤᠬᠤ᠂ ᠦᠵᠡᠬᠦ᠂ ᠬᠦᠷᠦᠯᠴᠡᠬᠦ ᠵᠡᠷᠭᠡ ᠲᠡᠰ ᠲᠠᠷᠠᠭᠠᠯᠠᠯ ᠢᠶᠠᠷ ᠶᠠᠪᠤᠭᠳᠠᠵᠤ ᠡᠪᠡᠳᠴᠢᠨ ᠢ ᠤᠨᠤᠰᠢᠯᠠᠨ ᠲᠤᠳᠤᠯᠠᠳᠠᠭ ᠶᠤᠮ᠃ ᠡᠭᠦᠨ ᠤ ᠲᠠᠷᠠᠭ᠎ᠠ ᠪᠠᠷ ᠰᠠᠶ᠋ᠢ ᠶᠠᠮᠠᠷ ᠵᠠᠰᠠᠯ ᠬᠢᠵᠦ ᠶᠠᠮᠠᠷ ᠡᠮ ᠲᠠᠩ ᠦᠭᠭᠦ ᠪᠠᠨ ᠲᠤᠭᠳᠠᠭᠠᠳᠠᠭ ᠶᠤᠮ ᠡ᠂ ᠬᠠᠷᠢᠨ ᠬᠠᠰᠢ ᠶᠠᠰᠢ ᠰᠤᠳᠠᠯ ᠳᠤ ᠬᠦᠷᠦᠯᠴᠡᠬᠦ ᠶᠢᠨ ᠲᠡᠳᠦᠶᠢᠬᠡᠨ ᠢᠶᠠᠷ ᠪᠤᠶᠤ ᠴᠢᠷᠠᠢ ᠶᠢ ᠨᠢ ᠦᠵᠡᠭᠰᠡᠭᠡᠷ ᠶᠠᠮᠠᠷ ᠡᠪᠡᠳᠴᠢᠨ ᠭᠡᠬᠦ ᠡᠰᠡᠬᠦᠯ᠎ᠡ ᠠᠰᠠᠭᠤᠭᠰᠠᠭᠠᠷ ᠯᠠ ᠡᠮ ᠲᠠᠩ ᠲᠠᠯᠪᠢᠬᠤ ᠪᠣᠯ ᠨᠠᠵᠠᠭᠠᠢ ᠦᠵᠡᠭᠳᠡᠯ ᠪᠤᠯᠤᠨ᠎ᠠ ᠭᠡᠰᠡᠨ ᠢ ᠲᠠᠨᠢᠵᠤ ᠪᠠᠶᠢᠬᠤ ᠪᠤᠯ ᠡᠮᠴᠢ ᠪᠤᠯᠠᠤᠭᠰᠠᠨ ᠪᠢᠳᠡ ᠪᠦᠬᠦᠨ ᠤ ᠤᠮᠳᠠᠭᠠᠶᠢᠯᠠᠵᠤ ᠪᠤᠯᠤᠰᠢ ᠦᠭᠡᠢ ᠴᠢᠬᠤᠯᠠ ᠠᠰᠠᠭᠤᠳᠠᠯ ᠪᠤᠯᠤᠨ᠎ᠠ᠃ ᠶᠠᠭᠠᠬᠢᠭᠰᠠᠨ ᠴᠦ ᠤᠷᠢᠳᠠ ᠪᠠᠷ ᠠᠰᠠᠭᠤᠵᠤ ᠮᠦᠨ ᠲᠠᠷᠠᠭ᠎ᠠ ᠪᠠᠷ ᠴᠢᠷᠠᠢ ᠨᠢᠭᠤᠷ᠂ ᠬᠡᠯᠡ᠂ ᠨᠢᠳᠦ ᠭᠡᠬᠦ ᠮᠡᠳᠦ ᠤᠯᠠᠨ ᠲᠠᠯ᠎ᠠ ᠪᠠᠷ ᠰᠢᠨᠵᠢᠯᠡᠨ ᠲᠤᠭᠳᠠᠭᠠᠭᠰᠠᠨ ᠤ ᠲᠠᠷᠠᠭ᠎ᠠ ᠰᠤᠳᠠᠯ ᠳᠤ ᠬᠦᠷᠦᠯᠴᠡᠨ ᠶᠠᠮᠠᠷ ᠡᠪᠡᠳᠴᠢᠨ ᠭᠡᠰᠡᠨ ᠢᠶᠠᠨ ᠤᠨᠤᠰᠢᠯᠠᠨ ᠲᠤᠭᠳᠠᠭᠠᠭᠠᠳ ᠰᠠᠶ᠋ᠢ ᠡᠮ ᠲᠠᠩ ᠦᠭᠭᠦ ᠪᠤᠶᠤ ᠴᠤᠬᠤᠮ ᠶᠠᠮᠠᠷ ᠵᠠᠰᠠᠯ ᠬᠢᠬᠦ ᠪᠠᠨ ᠲᠤᠬᠢᠷᠠᠭᠤᠯᠳᠠᠭ ᠶᠤᠮ᠃ ᠬᠠᠷᠢᠨ ᠨᠡᠶᠢᠭᠡᠮ ᠨᠡᠶᠢᠳᠡ ᠶᠢᠨ ᠵᠠᠷᠢᠮ ᠨᠢᠭᠡᠨ ᠨᠦᠯᠦᠭᠡ ᠦᠵᠡᠭᠳᠡᠯ ᠠᠴᠠ ᠪᠤᠯᠵᠤ ᠵᠠᠷᠢᠮ ᠡᠮᠴᠢ ᠪᠠᠭᠰᠢ ᠨᠠᠷ ᠨᠢᠭᠡ ᠵᠦᠢᠯ ᠢ  ᠤᠮᠳᠠᠭᠠᠶᠢᠯᠠᠵᠤ ᠪᠠᠶᠢᠨ᠎ᠠ᠃      ᠵᠢᠰᠢᠶᠡᠯᠡᠪᠡᠯ᠄ ᠰᠤᠳᠠᠯ ᠢ ᠨᠢ ᠦᠵᠡᠭᠡᠳ ᠯᠠ ᠠᠰᠠᠭᠤᠬᠤ ᠶᠢ ᠲᠡᠪᠴᠢᠬᠦ᠂ ᠤᠴᠢᠷ ᠶᠠᠭᠤ ᠪᠤᠢ ᠭᠡᠪᠡᠯ ᠵᠦᠪᠬᠡᠨ ᠡᠪᠡᠳᠴᠢᠳᠡᠨ ᠳᠤ ᠦᠭᠬᠦ ᠨᠦᠯᠦᠭᠡ ᠶᠢ ᠯᠠ ᠪᠤᠳᠤᠯᠬᠢᠯᠠᠭᠰᠠᠨ ᠮᠠᠭᠠᠳ᠂ ᠨᠡᠶᠢᠭᠡᠮ ᠲᠡᠭᠡᠷ᠎ᠡ ᠵᠠᠷᠢᠮ ᠨᠢᠭᠡᠨ ᠦᠵᠡᠭᠡᠴᠢ᠂ ᠰᠢᠵᠢᠭᠡᠴᠢ ᠭᠡᠳ ᠬᠦᠮᠦᠨ ᠢ ᠦᠵᠡᠭᠰᠡᠭᠡᠷ ︽ᠣᠤ᠂ ᠲᠠ ᠴᠢᠨᠢ ᠶᠠᠮᠠᠷ ᠶᠠᠮᠠᠷ ᠡᠪᠡᠳᠴᠢᠨ ᠲᠠᠢ︾ ᠭᠡᠳ ᠰᠢᠭᠤᠳ ᠮᠡᠳᠡᠭᠰᠡᠨ ᠢᠶᠠᠷ ᠤᠪᠤᠷᠯᠠᠵᠤ ᠶᠠᠷᠢᠭᠠᠳ ᠪᠠᠶᠢᠳᠠᠭ᠂ ᠡᠨᠡ ᠨᠢ ᠲᠠᠭᠠᠮᠠᠭᠯᠠᠯ ᠲᠳᠦᠢ ᠭᠡᠳᠡᠭ ᠢ ᠮᠡᠳᠡᠬᠦ ᠬᠡᠷᠡᠭᠳᠠᠢ᠂ ᠲᠡᠷᠡ  ᠨᠢ ᠶᠠᠭ ᠰᠢᠪᠠᠭ᠎ᠠ ᠰᠤᠭᠤᠯᠠᠳᠠᠭ ᠲᠠᠢ ᠠᠳᠠᠯᠢ ᠬᠠᠶᠠ ᠵᠠᠷᠢᠮ ᠳᠠᠭᠠᠨ ᠨᠢᠭᠡ ᠬᠤᠶᠠᠷ ᠲᠠᠭᠠᠷᠠᠴᠢᠬᠠᠳᠠᠭ᠂ ᠡᠨᠡ ᠢ ᠨᠢ ᠡᠪᠡᠳᠴᠢᠳᠡᠨ ᠤᠶᠢᠯᠭᠠᠬᠤ ᠦᠭᠡᠢ ᠤᠴᠢᠷ ᠠᠴᠠ ︽ᠬᠦᠢ ᠲᠡᠷᠡ ᠴᠢᠨᠢ ᠠᠶᠤᠮᠠᠷ ᠦᠵᠡᠵᠦ ᠪᠠᠶᠢᠨ᠎ᠠ ᠶᠡᠷᠦ ᠨᠢ ᠰᠤᠳᠠᠯ ᠦᠵᠡᠭᠰᠡᠨ ᠴᠦ ᠦᠭᠡᠢ ᠪᠠᠷ ᠰᠢᠭᠤᠳ ᠬᠡᠯᠡᠴᠢᠬᠡᠯ᠎ᠡ ᠲᠡᠭᠡᠭᠡᠳ ᠤᠰᠤ ᠦᠯᠢᠶᠡᠭᠡᠳ ᠡᠪᠡᠳᠴᠢᠨ ᠵᠠᠰᠠᠴᠢᠬᠠᠯ᠎ᠠ᠂ ᠬᠠᠰ ᠴᠢᠯᠠᠭᠤ ᠪᠠᠷ ᠬᠡᠳᠦᠬᠡᠨ ᠠᠷᠴᠢᠭᠰᠠᠨ ᠴᠢᠨᠢ ᠰᠠᠶᠢᠨ ᠪᠤᠯᠴᠢᠬᠠᠯ᠎ᠠ︾ ᠭᠡᠵᠦ ᠦᠨᠡᠨ ᠬᠤᠳᠠᠯ ᠤᠨ ᠬᠤᠭᠤᠷᠤᠨᠳᠤ ᠴᠤᠤᠷᠬᠠᠯ ᠲᠡᠭᠳᠡᠭᠡᠵᠦ ᠬᠠᠭᠤᠮᠠᠭᠠᠢ ᠦᠵᠡᠭᠳᠡᠯ ᠪᠠᠷ ᠵᠤᠪᠠᠯᠠᠩᠳᠠᠨ ᠳᠤ ᠵᠤᠪᠠᠯᠠᠩ ᠨᠡᠮᠡᠷᠢᠯᠡᠳᠡᠭ ᠪᠠᠶᠢᠨ᠎ᠠ᠃      ᠡᠨᠡ ᠪᠦᠬᠦᠨ ᠢ ᠮᠠᠯᠴᠢᠨ ᠲᠦᠮᠡᠨ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠢᠯᠡ᠂ ᠬᠤᠳᠠᠯ ᠢ ᠦᠨᠡᠨ ᠳᠤ ᠪᠤᠯᠭᠠᠵᠤ ᠵᠠᠷᠢᠮ ᠨᠢᠭᠡ  ᠨᠢ ︽ᠡᠨᠡ ᠦᠨᠡᠬᠡᠷ ᠭᠠᠶᠢᠬᠠᠮᠰᠢᠭ ᠡ︕ ᠰᠤᠳᠠᠯ ᠦᠵᠡᠬᠦ ᠴᠦ ᠦᠭᠡᠢ᠂ ᠠᠰᠠᠭᠤᠬᠤ ᠴᠦ ᠦᠭᠡᠢ ᠠᠪᠤᠨ ᠲᠤᠤᠷ᠎ᠠ ᠨᠢ ᠶᠠᠷᠢᠴᠢᠬᠠᠨ᠎ᠠ︾ ᠭᠡᠳ ᠢᠳᠡᠬᠡᠯ ᠪᠢᠰᠢᠷᠡᠯ ᠨᠢ ᠪᠦᠷ ᠯᠠ ᠲᠡᠷᠡ ᠵᠦᠭ ᠲᠤ ᠬᠠᠨᠳᠤᠵᠤ᠂ ᠶᠠᠭᠤ ᠲᠠᠢ ᠶᠠᠭᠤ ᠦᠭᠡᠢ ᠪᠦᠷ ᠯᠠ ᠲᠡᠷᠡ ᠤᠷᠤᠭᠤ ᠴᠤᠪᠤᠴᠢᠬᠠᠳᠠᠭ᠂ ᠢᠩᠬᠢᠬᠦ ᠪᠠᠷ ᠮᠠᠨ ᠤ ᠨᠢᠭᠡ ᠪᠦᠯᠦᠭ ᠡᠮᠴᠢ ᠨᠠᠷ ᠴᠦ ᠠᠰᠠᠭᠤᠬᠤ ᠶᠢ ᠪᠠᠶᠢᠴᠢᠬᠠᠶ᠎ᠠ ᠭᠡᠳ‌ᠮᠦ᠋ᠨ ᠲᠡᠷᠡ ᠰᠢᠭ ᠲᠠᠭᠠᠮᠠᠭᠯᠠᠬᠤ ᠪᠠᠶᠢᠳᠠᠯ ᠳᠤ ᠰᠢᠯᠵᠢᠳᠡᠭ᠂ ᠡᠨᠡ ᠨᠢ ᠦᠪᠡᠷ ᠤᠨ ᠵᠢᠩᠬᠢᠨᠢ ᠤᠨᠤᠯ ᠮᠡᠳᠡᠯᠭᠡ᠂ ᠦᠪᠡᠷ ᠤᠨ ᠪᠠᠶᠢᠷᠢ ᠵᠤᠭᠰᠤᠯᠳᠠ ᠠᠴᠠ ᠪᠠᠨ ᠵᠠᠶᠢᠳᠠᠵᠤ ᠪᠠᠶᠢᠨ᠎ᠠ᠃ ᠠᠰᠠᠭᠤᠬᠤ ᠰᠢᠨᠵᠢᠯᠭᠡ ᠪᠤᠯ ᠡᠪᠡᠳᠴᠢᠳᠡᠨ ᠠᠴᠠ ᠪᠤᠶᠤ ᠰᠤᠪᠢᠯᠠᠨ ᠠᠰᠠᠷᠭᠴᠢ ᠠᠴᠠ ᠡᠪᠡᠳᠴᠢᠨ ᠤ ᠪᠦᠬᠦ ᠶᠠᠪᠤᠴᠠ ᠶᠢ ᠠᠩᠬ᠎ᠠ ᠠᠯᠬᠤᠮ ᠤᠶᠢᠯᠭᠠᠵᠤ ᠮᠡᠳᠡᠬᠦ ᠶᠢᠨ ᠬᠠᠮᠳᠤ ᠤᠨᠤᠪᠴᠢᠳᠠᠢ ᠤᠨᠤᠰᠢᠯᠠᠬᠤ ᠳᠤ ᠴᠢᠬᠤᠯᠠ ᠦᠢᠯᠡᠳᠦᠯ ᠭᠠᠷᠭᠠᠬᠤ ᠪᠤᠯᠤᠨ᠎ᠠ᠃ ᠠᠰᠠᠭᠤᠬᠤ ᠳᠠᠭᠠᠨ ᠨᠠᠰᠤ ᠵᠢᠯ᠂ ᠤᠷᠴᠢᠨ ᠠᠬᠤᠢ᠂ ᠶᠠᠮᠠᠷ ᠠᠵᠢᠯ ᠬᠢᠵᠦ ᠪᠠᠶᠢᠭ᠎ᠠ ᠶᠢ ᠠᠰᠠᠭᠤᠬᠤ ᠮᠡᠳᠦ ᠤᠯᠠᠨ ᠪᠠᠶᠢᠳᠠᠭ᠂ ᠭᠤᠤᠯᠳᠠᠭᠤ ᠡᠪᠡᠳᠴᠢᠨ ᠤ ᠰᠢᠨᠵᠢ ᠲᠡᠮᠳᠡᠭ ᠢ ᠠᠰᠠᠭᠤᠬᠤ ᠨᠢ ᠴᠢᠬᠤᠯᠠ ᠪᠠᠶᠢᠳᠠᠭ ᠶᠤᠮ᠃ ᠡᠭᠦᠨ ᠳᠤ ᠡᠪᠡᠳᠴᠢᠳᠡᠨ ᠤ ᠪᠡᠶ᠎ᠡ ᠳᠤ ᠬᠠᠮᠤᠭ ᠠᠴᠠ ᠢᠯᠡᠷᠬᠡᠢ ᠡᠪᠡᠷᠰᠢᠶᠡᠯ ᠲᠠᠢ ᠤᠷᠤᠨ ᠪᠠᠶᠢᠷᠢ ᠢ ᠮᠡᠳᠡᠬᠦ᠂ ᠲᠤᠬᠠᠶᠢᠯᠠᠪᠠᠯ ᠡᠪᠡᠳᠴᠢᠳᠡᠨ ᠤ ︽ᠠᠶᠤᠯᠢᠬᠠᠢ ᠲᠡᠭᠡᠷ᠎ᠡ ᠦᠷᠭᠦᠯᠵᠢ ᠬᠠᠯᠠᠵᠤ ᠵᠢᠷᠤᠵᠤ ᠡᠪᠡᠳᠦᠭᠡᠳ ᠬᠠᠭᠠᠰ ᠰᠠᠷ᠎ᠠ ᠪᠤᠯᠵᠤ ᠪᠠᠶᠢᠨ᠎ᠠ ︾ ᠭᠡᠰᠡᠨ ᠭᠤᠤᠯ ᠲᠤᠭᠠᠴᠢᠯᠳᠠ ᠶᠢ ᠡᠮᠴᠢ ᠪᠤᠯᠤᠭᠰᠠᠳ ︽ᠪᠡᠶ᠎ᠡ ᠶᠢᠨ ᠳᠤᠮᠳᠠ ᠭᠡᠰᠡᠭ ᠳᠠᠬᠢ ᠡᠪᠡᠳᠴᠢᠨ︾︽ᠰᠢᠷ᠎ᠠ ᠲᠡᠶᠢᠯᠡᠩᠭᠦᠢ ᠪᠤᠷᠤ︾᠂ ︽ᠰᠢᠨᠡᠬᠡᠨ ᠡᠪᠡᠳᠴᠢᠨ︾ ᠭᠡᠵᠦ ᠡᠪᠡᠳᠴᠢᠨ ᠤ ᠤᠷᠤᠨ ᠴᠠᠭ᠂ ᠮᠦᠨ ᠴᠢᠨᠠᠷ ᠤᠨ ᠡᠭᠦᠳᠡᠨ  ᠠᠴᠠ ᠠᠩᠬ᠎ᠠ ᠠᠯᠬᠤᠮ ᠤᠶᠢᠯᠭᠠᠵᠤ ᠪᠠᠰᠠ ᠲᠠᠬᠢᠭᠠᠳ ᠤᠳᠤᠬᠢ ᠡᠪᠡᠳᠴᠢᠨ ᠤ ᠪᠠᠶᠢᠳᠠᠯ ᠢ ᠠᠰᠠᠭᠤᠵᠤ  ︽ᠡᠪᠡᠳᠴᠢᠨ︾ ᠭᠡᠵᠦ ᠤᠶᠢᠯᠭᠠᠪᠠᠯ ᠲᠠᠭᠠᠷᠠᠨ᠎ᠠ᠃ ᠡᠭᠦᠨ ᠳᠤ᠄ ᠡᠪᠡᠳᠴᠢᠯᠡᠭᠰᠡᠨ ᠠᠴᠠ ᠠᠪᠤᠭᠠᠳ ᠲᠤᠰ ᠤᠳᠠᠭ᠎ᠠ ᠶᠢᠨ ᠪᠠᠶᠢᠴᠠᠭᠠᠯᠳᠠ ᠬᠦᠷᠲᠡᠯᠡᠬᠢ ᠬᠤᠭᠤᠴᠠᠭᠠᠨ ᠳᠤ ᠭᠠᠷᠤᠭᠰᠠᠨ ᠰᠢᠯᠳᠠᠭᠠᠨ᠂ ᠬᠦᠳᠡᠯᠭᠡᠬᠦ ᠨᠦᠬᠦᠴᠡᠯ᠂ ᠡᠪᠡᠳᠬᠦ ᠤᠨᠴᠠᠯᠢᠭ᠂ ᠡᠪᠡᠳᠬᠦ ᠤᠷᠤᠨ᠂ ᠡᠪᠡᠳᠬᠦ ᠴᠠᠭ᠂ ᠬᠠᠷᠰᠢᠯᠠᠬᠤ ᠢᠳᠡᠭᠡᠨ ᠤᠮᠳᠠᠭᠠᠨ ᠤᠳ ᠢ ᠠᠯᠭᠠᠰᠠᠯ ᠦᠭᠡᠢ ᠮᠦᠷᠳᠡᠨ ᠠᠰᠠᠭᠤᠨ᠎ᠠ᠃        ᠰᠢᠯᠳᠠᠭᠠᠨ ᠨᠦᠬᠦᠴᠡᠯ ᠢ ᠠᠰᠠᠭᠤᠬᠤ᠄ ᠡᠪᠡᠳᠴᠢᠳᠡᠨ ᠡᠷᠡᠭᠦᠯ ᠦᠶ᠎ᠡ ᠳᠡᠭᠡᠨ ᠶᠠᠮᠠᠷ ᠦᠪᠡᠷᠮᠢᠴᠡ ᠴᠢᠨᠠᠷ ᠲᠠᠢ ᠪᠠᠶᠢᠭᠰᠠᠨ ᠢ ᠤᠶᠢᠯᠭᠠᠵᠤ ᠮᠡᠳᠡᠬᠦ ᠶᠢᠨ ᠬᠠᠮᠳᠤ ᠶᠠᠮᠠᠷ ᠨᠦᠬᠦᠴᠡᠯ ᠢᠶᠠᠷ ᠡᠪᠡᠳᠴᠢᠨ ᠬᠦᠳᠡᠯᠦᠭᠰᠡᠨ ᠢ ᠠᠰᠠᠭᠤᠨ᠎ᠠ᠃ ᠵᠢᠰᠢᠶᠡᠯᠡᠭᠡᠳ ᠶᠠᠷᠢᠪᠠᠯ᠂ ᠡᠪᠡᠳᠴᠢᠳᠡᠨ ᠬᠡᠷᠪᠡ ᠡᠬᠡᠬᠦᠨ᠂ ᠭᠠᠰᠢᠭᠤᠨ᠂ ᠬᠦᠩᠭᠡᠨ᠂ ᠰᠢᠷᠦᠭᠦᠨ ᠰᠢᠮ᠎ᠡ ᠦᠭᠡᠢ ᠵᠦᠢᠯ ᠢ ᠦᠷᠭᠦᠯᠵᠢ ᠬᠡᠷᠡᠭᠯᠡᠳᠡᠭ ︵ᠢᠳᠡᠵᠦ ᠤᠤᠭᠤᠳᠠᠭ︶ ᠪᠤᠶᠤ ᠬᠡᠳᠡᠷᠡᠭᠦᠯᠦᠭᠰᠡᠨ ᠪᠠᠶᠢᠪᠠᠯ ᠬᠡᠢ ᠲᠡᠶᠢᠯᠡᠩᠭᠦᠢ᠃ ᠭᠤᠰᠢᠭᠤᠨ᠂ ᠢᠰᠬᠦᠯᠡᠩ᠂ ᠲᠠᠪᠤᠰᠤᠯᠢᠭ᠂ ᠬᠠᠯᠠᠭᠤᠨ ᠬᠤᠷᠴᠠ ︵ᠮᠢᠬ᠎ᠠ ᠲᠤᠰᠤ᠂ ᠠᠷᠢᠬᠢ᠂ ᠪᠦᠯᠢᠶᠡᠨ ᠰᠢᠮᠡᠳᠦ︶ ᠵᠦᠢᠯ ᠢ ᠦᠷᠬᠦᠯᠵᠢ ᠡᠳᠡᠯᠡᠳᠡᠭ ᠪᠤᠶᠤ ᠬᠡᠳᠦᠷᠦᠭᠰᠡᠨ ᠠᠴᠠ ᠰᠢᠷ᠎ᠠ ᠲᠡᠶᠢᠯᠦᠩᠭᠡᠢ ᠬᠡᠬᠦ᠃ ᠠᠮᠳᠠᠯᠢᠭ᠂ ᠬᠦᠨᠳᠦ᠂ ᠲᠤᠰᠤᠯᠢᠭ ᠰᠢᠩᠭᠡᠬᠦ ᠳᠤ ᠪᠡᠷᠬᠡ ᠵᠦᠢᠯ ᠢ ᠦᠷᠭᠦᠯᠵᠢ ᠡᠳᠡᠯᠡᠵᠦ ᠪᠠᠶᠢᠭᠰᠠᠨ ᠪᠤᠶᠤ ᠬᠡᠳᠦᠷᠡᠭᠦᠯᠦᠭᠰᠡᠨ ᠪᠠᠶᠢᠪᠠᠯ ᠪᠠᠳᠭᠠᠨ ᠴᠢᠨᠠᠷ ᠳᠡᠶᠢᠯᠦᠩᠭᠡᠢ ᠭᠡᠵᠦ ᠲᠤᠰ ᠲᠤᠰ ᠤᠶᠢᠯᠭᠠᠵᠤ ᠠᠪᠤᠳᠠᠭ᠃ ᠡᠳᠡᠭᠡᠷ ᠨᠢ ᠦᠨᠡᠨ ᠳᠡᠭᠡᠨ ᠲᠤᠩ ᠲᠦᠭᠦᠮ ᠠᠪᠰᠠᠷᠬᠠᠨ ᠨᠢᠭᠡᠨ ᠵᠦᠢᠯ  ᠤᠨ ᠠᠩᠬ᠎ᠠ ᠠᠯᠬᠤᠮ ᠤᠶᠢᠯᠭᠠᠵᠤ ᠮᠡᠳᠡᠬᠦ ᠶᠢᠨ ᠬᠠᠮᠳᠤ ᠠᠳᠡᠭᠦᠷᠡᠯ ᠦᠭᠡᠢ ᠡᠪᠡᠳᠴᠢᠨ ᠲᠤᠳᠤᠯᠠᠬᠤ ᠳᠤ ᠲᠤᠩ ᠶᠡᠭᠡ ᠬᠠᠪᠰᠤᠷᠠᠮᠵᠢ ᠠᠪᠴᠢᠷᠠᠳᠠᠭ ᠭᠡᠳᠡᠭ ᠢ ᠤᠶᠢᠯᠭᠠᠪᠠᠯ ᠵᠦᠢᠳᠠᠢ ᠭᠡᠵᠦ ᠦᠵᠡᠨ᠎ᠡ᠃ ᠮᠦᠨ ᠴᠦ ᠵᠠᠯᠭᠠᠭᠠᠳ ᠶᠠᠪᠤᠳᠠᠯ ᠮᠦᠷ ᠤᠨ ᠲᠠᠯ᠎ᠠ ᠪᠠᠷ ᠡᠪᠳᠴᠢᠳᠡᠨ ᠤ ᠡᠳᠦᠷ ᠳᠤᠳᠤᠮ ᠤᠨ ᠬᠦᠳᠡᠯᠭᠡᠭᠡᠨ ᠪᠠ ᠤᠨᠳᠠᠵᠤ ᠬᠡᠪᠳᠡᠬᠦ᠂ ᠶᠠᠷᠢᠵᠤ ᠬᠡᠯᠡᠬᠦ ᠵᠡᠷᠭᠡ ᠶᠢ ᠵᠣᠬᠢᠰᠳᠠᠢ ᠡᠳᠡᠯᠡᠭᠰᠡᠨ ᠡᠰᠡᠬᠦ ᠶᠢ ᠠᠰᠠᠭᠤᠬᠤ᠂ ᠰᠡᠳᠬᠢᠯ ᠤᠨ ᠦᠢᠯᠡ ᠬᠡᠳᠦᠷᠡᠭᠰᠡᠨ ᠡᠰᠡᠬᠦ᠂ ᠨᠤᠶᠢᠷ ᠬᠤᠭᠤᠯᠠ᠂ ᠠᠭᠤᠷ ᠬᠢᠯᠢᠩ ᠭᠡᠬᠦ ᠮᠡᠳᠦ ᠪᠠᠷ ᠤᠯᠠᠨ ᠪᠠᠶᠢᠳᠠᠭ᠃      ᠲᠠᠬᠢᠪᠠᠯ᠂ ᠴᠠᠭ ᠠᠭᠤᠷ ᠤᠨ ᠲᠠᠯ᠎ᠠ ᠪᠠᠷ ᠬᠤᠷ᠎ᠠ ᠶᠢᠨ ᠴᠠᠭ ᠪᠤᠶᠤ ᠬᠠᠯᠠᠭᠤᠨ ᠪᠤᠯᠤᠨ ᠬᠦᠢᠳᠡᠨ ᠤ ᠴᠠᠭ ᠭᠡᠬᠦ ᠮᠡᠳᠦ᠂ ᠡᠭᠦᠨ ᠳᠤ ᠬᠠᠯᠠᠭᠤᠨ ᠤ ᠴᠠᠭ ︵ᠵᠤᠨ︶ ᠬᠤᠷ᠎ᠠ ᠪᠤᠷᠤᠭᠠᠨ ᠳᠤ ᠨᠤᠷᠤᠭᠳᠠᠭᠰᠠᠨ ᠠᠴᠠ ᠪᠤᠯᠤᠭᠰᠠᠨ ᠪᠤᠯ ᠬᠡᠢ ᠳᠡᠶᠢᠯᠦᠩᠭᠡᠢ᠂ ᠰᠡᠷᠢᠭᠦᠨ ᠤ ᠴᠠᠭ ︵ᠨᠠᠮᠤᠷ︶ ᠬᠠᠯᠠᠭᠤᠨ ᠬᠡᠳᠦᠷᠡᠭᠰᠡᠨ ᠠᠴᠠ ᠪᠤᠯᠤᠭᠰᠠᠨ ᠪᠤᠯ ᠰᠢᠷ᠎ᠠ ᠳᠡᠶᠢᠯᠦᠩᠭᠡᠢ᠂ ᠲᠤᠯᠠᠭᠠᠨ ᠤ ᠴᠠᠭ ︵ᠬᠠᠪᠤᠷ︶ ᠬᠡᠳᠦᠷᠬᠡᠢ ᠲᠠᠭᠠᠷᠤᠭᠰᠠᠨ ᠠᠴᠠ ᠪᠤᠯᠤᠭᠰᠠᠨ ᠪᠣᠯ ᠪᠠᠳᠭᠠᠨ ᠳᠡᠶᠢᠯᠦᠩᠭᠡᠢ᠂ ᠲᠡᠷᠡᠴᠢᠯᠡᠨ ᠬᠠᠯᠠᠭᠤᠨ ᠤ ᠴᠠᠭ ᠬᠠᠯᠠᠭᠤᠨ ᠬᠡᠳᠦᠷᠡᠭᠰᠡᠨ ᠪᠠᠶᠢᠪᠠᠯ ᠰᠢᠷ᠎ᠠ ᠠᠷᠪᠢᠳᠠᠬᠤ᠂ ᠬᠦᠢᠳᠡᠨ ᠤ ᠴᠠᠭ ᠬᠦᠢᠳᠡᠨ ᠬᠡᠳᠦᠷᠡᠭᠰᠡᠨ ᠪᠠᠶᠢᠪᠠᠯ ᠪᠠᠳᠭᠠᠨ ᠬᠦᠢᠳᠡᠨ ᠠᠷᠪᠢᠳᠠᠬᠤ ᠭᠡᠬᠦ ᠮᠡᠳᠦ ᠪᠠᠷ ᠴᠠᠭ ᠤᠯᠠᠷᠢᠯ᠂ ᠠᠭᠤᠷ ᠠᠮᠢᠰᠬᠤᠯ ᠤᠨ ᠢᠯᠡᠭᠦᠳᠡᠬᠦ ᠲᠤᠳᠠᠭᠤᠳᠠᠬᠤ᠂ ᠪᠤᠷᠤᠭᠤᠳᠠᠬᠤ ᠪᠠᠷ ᠭᠡᠮ ᠤᠳ ᠤᠨ ᠠᠷᠪᠢᠳᠠᠬᠤ᠂ ᠬᠤᠷᠤᠭᠳᠠᠬᠤ᠂ ᠬᠢᠮᠤᠷᠠᠬᠤ ᠶᠢ ᠮᠡᠳᠡᠵᠦ ᠪᠤᠯᠤᠨ᠎ᠠ᠃      ᠲᠡᠭᠡᠷᠡᠬᠢ ᠬᠡᠳᠦᠨ ᠨᠦᠬᠦᠴᠡᠯ ᠠᠴᠠ ᠭᠠᠳᠠᠨ᠎ᠠ᠂ ᠭᠡᠨᠡᠳᠳᠡ ᠠᠶᠤᠵᠤ ᠰᠤᠴᠢᠭᠰᠠ᠂ ᠤᠨᠠᠵᠤ ᠲᠤᠰᠤᠭᠰᠠᠨ ᠪᠠ ᠨᠢᠶᠠᠨ ᠬᠠᠯᠳᠠᠪᠤᠷᠢᠯᠠᠭᠰᠠᠨ ᠡᠰᠡᠬᠦ ᠶᠢ ᠪᠠᠰᠠ ᠠᠰᠠᠭᠤᠵᠤ ᠰᠢᠨᠵᠢᠯᠡᠬᠦ ᠴᠢᠬᠤᠯᠠ ᠲᠠᠢ ᠶᠤᠮ ᠪᠠᠶᠢᠨ᠎ᠠ᠃ ᠡᠪᠡᠳᠴᠢᠨ ᠤ ᠰᠢᠨᠵᠢ ᠲᠡᠮᠳᠡᠭ ᠢ ᠠᠰᠭᠤᠬᠤ᠄ ᠡᠭᠦᠨ ᠳᠤ ᠭᠤᠤᠯ ᠨᠢ ᠬᠡᠢ᠂ ᠰᠢᠷ᠎ᠠ᠂ ᠪᠠᠳᠭᠠᠨ ᠵᠡᠷᠭᠡ ᠡᠪᠡᠳᠴᠢᠨ ᠤ ᠤᠨᠴᠠᠯᠢᠭ ᠵᠢᠴᠢ ᠡᠪᠡᠳᠬᠦ ᠤᠷᠤᠨ᠂ ᠡᠪᠡᠳᠬᠦ ᠪᠠᠶᠢᠳᠠᠯ᠂ ᠡᠪᠡᠳᠬᠦ ᠴᠠᠭ᠂ ᠲᠤᠰᠠᠯᠠᠬᠤ ᠬᠠᠷᠰᠢᠯᠠᠬᠤ ᠵᠡᠷᠭᠡ ᠬᠡᠳᠦᠨ ᠲᠠᠯ᠎ᠠ ᠠᠴᠠ ᠡᠪᠡᠳᠴᠢᠨ ᠢ ᠤᠨᠤᠰᠢᠯᠠᠨ ᠲᠤᠳᠤᠯᠠᠵᠤ ᠡᠮ ᠵᠤᠷ ᠲᠠᠯᠪᠢᠬᠤ ᠳᠤ ᠶᠡᠭᠡ ᠬᠡᠮᠵᠢᠶᠡᠨ ᠤ ᠦᠢᠯᠡᠳᠦᠯ ᠦᠵᠡᠭᠦᠯᠳᠡᠭ ᠢ ᠲᠤᠷᠰᠢᠯᠭ᠎ᠠ ᠬᠡᠷᠴᠢᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠲᠬᠢᠭᠠᠳ ᠶᠠᠷᠢᠪᠠᠯ ᠬᠡᠢ ᠡᠪᠡᠳᠴᠢᠨ ᠤ ᠡᠪᠡᠳᠬᠦ ᠤᠨᠴᠠᠯᠢᠭ᠂ ᠤᠷᠤᠨ᠂ ᠡᠪᠡᠳᠬᠦ ᠪᠠᠶᠢᠳᠠᠯ᠂ ᠡᠪᠡᠳᠬᠦ ᠴᠠᠭ᠂ ᠲᠤᠰᠠᠯᠠᠬᠤ ᠢᠳᠡᠭᠡᠨ ᠤᠮᠳᠠᠭᠠᠨ ᠪᠤᠶᠤ ᠬᠤᠤᠷᠯᠠᠬᠤ ᠢᠳᠡᠭᠡᠨ ᠤᠮᠳᠠᠭᠠᠨ ᠭᠡᠬᠦ ᠮᠡᠳᠦ ᠤᠯᠠᠨ ᠵᠦᠢᠯ ᠪᠠᠶᠢᠳᠠᠭ᠂ ᠰᠢᠷ᠎ᠠ ᠪᠠᠳᠭᠠᠨ ᠤ ᠬᠢ ᠴᠦ ᠮᠦᠨ ᠠᠳᠠᠯᠢ ᠪᠠᠷ ᠰᠢᠨᠵᠢᠭᠳᠡᠬᠦ ᠤᠯᠠᠨ ᠵᠦᠢᠯ ᠤᠨ ᠰᠢᠨᠵᠢ ᠲᠡᠮᠳᠡᠭ ᠪᠠᠶᠢᠳᠠᠭ ᠢ ︽ᠠᠨᠠᠭᠠᠬᠤ ᠤᠬᠠᠭᠠᠨ ᠤ ᠲᠦᠷᠪᠡᠨ ᠦᠨᠳᠦᠰᠦ︾ ᠮᠡᠳᠦ ᠨᠤᠮ ᠰᠤᠳᠤᠷ ᠠᠴᠠ ᠰᠠᠶᠢᠳᠤᠷ ᠤᠶᠢᠯᠭᠠᠵᠤ ᠤᠶᠠᠯᠳᠠᠭᠤᠯᠪᠠᠯ ᠰᠠᠶᠢᠨ ᠭᠡᠵᠦ ᠶᠠᠷᠢᠬᠤ ᠶᠢᠨ ᠬᠠᠮᠳᠤ ᠨᠤᠤᠷᠰᠢᠬᠤ ᠢ ᠴᠦᠭᠡᠳᠬᠡᠵᠦ ᠲᠤᠪᠴᠢᠯᠠᠨ ᠪᠠᠶᠢᠨ᠎ᠠ᠃ ᠡᠶᠢᠮᠦ ᠠᠴᠠ ᠦᠵᠡᠬᠦ ᠰᠢᠨᠵᠢᠯᠭᠡ᠂ ᠠᠰᠠᠭᠤᠬᠤ ᠰᠢᠨᠵᠢᠯᠭᠡ ᠮᠡᠳᠦ ᠤᠯᠠᠨ ᠠᠷᠪᠢᠨ ᠰᠢᠨᠵᠢᠯᠭᠡ ᠮᠠᠨ ᠤ ᠡᠮᠴᠢᠯᠭᠡ ᠳᠤᠮᠳᠠ ᠶᠡᠭᠡ ᠬᠡᠮᠵᠢᠶᠡᠨ ᠤ ᠨᠦᠯᠦᠭᠡ ᠦᠵᠡᠭᠦᠯᠵᠦ ᠪᠠᠶᠢᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠬᠤᠵᠢᠮ ᠤᠨ ᠰᠤᠷᠴᠤ ᠰᠤᠳᠤᠯᠠᠬᠤ ᠳᠤ ᠨᠡᠩ ᠢᠯᠡᠭᠦᠦ ᠤᠯᠳᠠᠰᠢ ᠦᠭᠡᠢ ᠵᠦᠢᠯ ᠪᠤᠯᠤᠨ᠎ᠠ ᠭᠡᠵᠦ ᠶᠠᠷᠢᠮᠠᠷ ᠪᠠᠶᠢᠨ᠎ᠠ᠃                ᠠᠰᠠᠭᠤᠨ ᠤᠶᠢᠯᠭᠠᠬᠤ ᠪᠤᠯ ᠡᠮ ᠡᠮᠨᠡᠯᠭᠡ ᠲᠡᠭᠡᠷ᠎ᠡ ᠦᠷᠭᠡᠨ ᠬᠡᠪᠴᠢᠶ᠎ᠡ ᠪᠠᠷ ᠬᠡᠷᠡᠭᠯᠡᠭᠡᠳ ᠤᠳᠤ ᠳᠤ ᠪᠤᠯᠵᠠᠢ᠂ ᠤᠳᠤ ᠪᠤᠯᠵᠤ ᠤᠯᠠᠮᠵᠢᠯᠠᠯᠳᠤ ᠠᠨᠠᠭᠠᠬᠤ ᠤᠬᠠᠭᠠᠨ ᠢ ᠬᠦᠭᠵᠢᠭᠦᠯᠬᠦ ᠭᠡᠰᠡᠨ ᠡᠷᠬᠢᠮ ᠲᠡᠭᠡᠳᠦ ᠤᠷᠢᠶᠠᠯᠭ᠎ᠠ ᠶᠢᠨ ᠳᠤᠤᠷ᠎ᠠ ᠦᠪᠡᠷ ᠦᠪᠡᠷ ᠤᠨ ᠦᠨᠳᠦᠰᠦᠳᠡᠨ ᠤ ᠡᠮ ᠡᠮᠨᠡᠯᠭᠡ ᠶᠢᠨ ᠢᠶᠠᠨ ᠤᠤᠯ ᠴᠢᠨᠠᠷ᠂ ᠦᠨᠦᠷ ᠠᠮᠳᠠ ᠶᠢ ᠨᠢ ᠠᠯᠳᠠᠭᠤᠯᠤᠯ ᠦᠭᠡᠢ ᠪᠠᠶᠢᠬᠤ ᠢ ᠦᠪᠡᠷ ᠬᠤᠪᠢᠨ ᠠᠴᠠ ᠪᠠᠨ ᠡᠬᠢᠯᠡᠨ ᠨᠠᠨᠳᠢᠩᠨᠠᠨ ᠪᠠᠶᠢᠬᠤ ᠢ ᠬᠦᠰᠡᠵᠦ ᠪᠠᠶᠢᠨ᠎ᠠ᠃      ᠬᠠᠮᠤᠭ ᠰᠡᠭᠦᠯ ᠳᠤᠨᠢ ᠡᠷᠬᠢᠮ ᠤᠯᠠᠨ ᠡᠷᠳᠡᠮᠳᠡᠨ ᠪᠠᠭᠰᠢᠨᠠᠷ ᠪᠤᠯᠤᠨ ᠢᠷᠡᠭᠡᠳᠦᠢ ᠳᠤ ᠴᠤᠯᠭᠤᠷᠠᠨ ᠭᠠᠷᠴᠤ ᠪᠠᠶᠢᠭ᠎ᠠ ᠲᠠᠪᠰᠢᠩᠭᠤᠢ ᠦᠵᠡᠯ ᠲᠠᠢ ᠵᠠᠯᠠᠭᠤ ᠨᠢᠭᠡᠨ ᠦᠶ᠎ᠡ ᠶᠢᠨ ᠠᠨᠠᠭᠠᠬᠤ ᠢ ᠰᠤᠳᠤᠯᠠᠵᠤ ᠰᠤᠷᠤᠯᠴᠠᠵᠤ ᠪᠠᠶᠢᠭ᠎ᠠ ᠪᠦᠬᠦᠨ ᠳᠡᠭᠡᠨ` ᠬᠦᠰᠡᠬᠦ ᠨᠢ ᠮᠤᠩᠭᠤᠯ ᠤᠯᠠᠮᠵᠢᠯᠠᠯᠳᠤ ᠡᠮᠨᠡᠯᠭᠡ ᠪᠠᠨ ᠮᠤᠩᠭᠤᠯ ᠬᠡᠦᠬᠡᠳ ᠲᠡᠭᠦᠨᠡᠷ ᠳᠡᠭᠡᠨ ᠵᠢᠭᠠᠨ ᠰᠤᠷᠭᠠᠬᠤ ᠪᠤᠶᠤ ᠶᠠᠮᠠᠷ ᠨᠢᠭᠡᠨ ᠰᠤᠳᠤᠯᠠᠨ ᠶᠠᠷᠢᠯᠴᠠᠬᠤ ᠬᠤᠷᠠᠯ ᠳᠠᠭᠠᠨ ᠬᠢᠳᠠᠳ ᠢ ᠲᠠᠨᠢᠳᠠᠭ ᠦᠭᠡᠢ᠂ ᠤᠶᠢᠯᠭᠠᠳᠠᠭ ᠦᠭᠡᠢ ᠮᠤᠩᠭᠤᠯ ᠳᠠᠭᠠᠨ ᠮᠤᠩᠭᠤᠯ ᠪᠠᠷ ᠶᠠᠷᠢᠵᠤ ᠵᠢᠩᠬᠢᠨᠢ ᠮᠤᠩᠭᠤᠯ ᠤᠯᠠᠮᠵᠢᠯᠠᠯᠳᠤ ᠪᠤᠯᠭᠠᠨ ᠦᠪᠯᠡᠬᠦ ᠪᠤᠯᠪᠠᠤ ᠭᠡᠵᠦ ᠬᠦᠰᠡᠯ᠎ᠡ᠂ ᠵᠠᠰᠠᠪᠤᠷᠢᠯᠠᠨ ᠠᠪᠬᠤ ᠳᠤ ᠢᠳᠡᠬᠡᠨᠡᠮ᠃      ᠡᠮᠬᠡᠭ ᠵᠦᠢᠯ ᠤᠨ ᠲᠦᠷᠪᠡᠨ ᠵᠠᠭᠤᠨ ᠲᠦᠷᠪᠡᠨ ᠨᠦᠭᠦᠳ ᠠᠮᠤᠷᠯᠢᠨ᠂      ᠵᠤᠬᠢᠰ ᠦᠭᠡᠢ ᠬᠤᠤᠷᠯᠠᠭᠳᠠᠬᠤᠢ ᠤᠴᠢᠷ ᠠᠴᠠ ᠬᠠᠭᠠᠴᠠᠨ᠂      ᠵᠤᠬᠢᠰᠳᠠᠶᠢᠶ᠎ᠠ ᠪᠦᠳᠦᠬᠦᠢ ᠪᠠ ᠪᠦᠷᠢᠨ ᠲᠡᠭᠦᠰ ᠪᠤᠯᠤᠭᠴᠢ᠂      ᠲᠡᠶᠢᠮᠦ ᠦᠯᠵᠡᠢ ᠠᠳᠡ ᠮᠠᠨ ᠳᠤᠷ ᠠᠮᠤᠭᠤᠯᠠᠩ ᠪᠤᠯᠳᠤᠭᠠᠢ᠃                                — ᠪᠤᠷᠵᠢᠬᠢᠨ ᠨᠠᠩᠷᠦᠪ
 
ᠢᠷᠡᠯᠲᠡ᠄ ᠬᠤᠯᠪᠤᠭ᠎ᠠ ᠪᠦᠷᠭᠡ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
 
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号