ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠦᠢᠯᠡᠴᠢᠯᠡᠭᠡ
ᠡᠭᠡᠰᠢᠭ ᠭᠡᠶᠢᠭᠦᠯᠦᠭᠴᠢ ᠡᠷᠳᠡᠨᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/9/11
     ᠡᠭᠡ ᠰᠢᠭ ᠡᠷᠬᠢᠮ ᠰᠤᠶᠤᠯ ᠤᠨ ᠡᠷᠳᠡᠨᠢ ᠶᠢᠨ ᠲᠦᠯᠬᠢᠭᠦᠷ ᠢ ᠠᠳᠬᠤᠵᠦ ᠪᠠᠶᠢᠭ᠎ᠠ ᠡᠵᠢ ᠶᠢᠨ ᠨᠡᠷ᠎ᠡ ᠲᠠᠢ ᠡᠨᠡᠷᠢᠯᠳᠦ ᠪᠠᠭᠰᠢ ᠮᠢᠨᠢ ᠲᠠ ᠰᠠᠶᠢᠨ ᠪᠠᠶᠢᠨ᠎ᠠ ᠤᠤ︖      ᠡᠴᠢᠭᠡ ᠰᠢᠭ ᠭᠡᠶᠢᠭᠦᠯᠦᠭᠴᠢ ᠡᠭᠡ ᠭᠡᠯᠡᠨ ᠤ ᠲᠠᠷᠬᠠᠨ ᠪᠠᠶᠢᠯᠳᠤᠬᠴᠢ᠂ ᠠᠪᠤ ᠶᠢᠨ ᠪᠠᠶᠢᠷᠢ ᠲᠠᠢ ᠠᠴᠢᠳᠤ ᠪᠠᠭᠰᠢ ᠨᠠᠷ ᠮᠢᠨᠢ ᠰᠠᠶᠢᠬᠠᠨ ᠵᠤᠰᠠᠵᠦ ᠪᠠᠶᠢᠨ᠎ᠠ ᠤᠤ︖      ᠡᠭᠡᠰᠢᠭ ᠭᠡᠶᠢᠭᠦᠯᠦᠭᠴᠢ ᠶᠢᠨ ᠵᠤᠬᠢᠴᠠᠯ ᠢᠶᠠᠷ ᠡᠷᠡᠯᠭᠡᠭ ᠮᠤᠩᠭᠤᠯ ᠤᠨ ᠭᠦᠭᠡ ᠰᠤᠳᠤᠷ ᠢ ᠡᠮᠬᠢᠯᠡᠨ ᠪᠢᠴᠢᠭᠯᠡᠭᠦ ᠤᠯᠠᠨ ᠲᠤᠭᠠᠨ ᠤ ᠲᠠᠭᠠᠪᠤᠷᠢ ᠶᠢᠨ ᠨᠢᠭᠡ᠂ ᠡᠷᠬᠢᠮ ᠲᠠᠨ ᠳᠠᠭᠠᠨ ᠠᠳᠡ ᠠᠴᠠ ᠶᠤᠰᠤᠯᠠᠨ ᠵᠤᠯᠭᠠᠵᠦ ᠪᠠᠶᠢᠨ᠎ᠠ︕      ᠡᠷᠬᠡᠰ ᠤᠷᠴᠢᠯᠠᠩ ᠤᠨ ᠠᠭᠤᠳᠠᠮ ᠵᠠᠶᠢᠴᠢᠨ ᠳᠤ ᠡᠴᠢᠭᠡ ᠡᠭᠡ ᠮᠢᠨᠢ ᠨᠠᠮᠠᠢᠢ ᠲᠦᠷᠦᠭᠦᠯᠵᠦ᠂ ᠡᠶᠡᠷᠭᠦ ᠡᠨᠧᠷᠬᠢ ᠲᠠᠪᠰᠢᠬᠤ ᠤᠬᠠᠮᠰᠠᠷ ᠢᠶᠠᠷ ᠦᠰᠭᠡᠨ ᠭᠦᠮᠦᠵᠢᠭᠦᠯᠵᠦ ᠪᠠᠶᠢᠭ᠎ᠠ ᠨᠢ ᠮᠢᠨᠦ ᠵᠢᠷᠭᠠᠯ᠂ ᠮᠤᠩᠭᠤᠯ ᠤᠨ ᠵᠢᠷᠭᠠᠯᠠᠩ︕      ᠡᠭᠡᠰᠢᠭ ᠭᠡᠶᠢᠭᠦᠯᠦᠭᠴᠢ ᠡᠷᠳᠡᠨᠢ ᠪᠠᠨ ᠡᠷᠬᠢᠮᠯᠡᠨ ᠲᠡᠭᠡᠳᠦᠯᠡᠵᠦ ᠡᠭᠡᠰᠢᠭᠯᠡᠨ ᠰᠢᠯᠦᠭᠯᠡᠭᠦ ᠪᠤᠯ ᠮᠢᠨᠦ ᠦᠨᠦᠳᠦᠷ  ᠤᠨ ᠵᠤᠷᠢᠯᠳᠠ᠂ ᠡᠨᠡ ᠨᠠᠰᠤᠨ ᠤ ᠬᠠᠷᠠᠯᠳᠠ᠂ ᠦᠨᠢ ᠮᠦᠩᠭᠡ ᠲᠠᠭᠤᠯᠠᠵᠦ ᠶᠠᠪᠤᠬᠤ ᠨᠠᠷᠠᠨ ᠴᠠᠭᠠᠨ ᠭᠦᠰᠡᠯᠳᠡ︕      ᠬᠤᠷᠳᠤᠨ ᠪᠢᠴᠢᠯᠭᠡ ᠪᠠᠷ ᠢᠶᠠᠨ ᠬᠤᠷᠸ᠎ᠠ ᠳᠤ ᠠᠯᠳᠠᠷᠳᠠᠢ ᠮᠤᠩᠭᠤᠯ ᠪᠢᠴᠢᠭ ᠢᠶᠠᠨ ᠮᠤᠯᠤᠷ ᠡᠷᠳᠡᠨᠢ ᠰᠢᠭ ᠭᠦᠨᠳᠦᠯᠡᠵᠦ ᠶᠠᠪᠤᠬᠤ ᠪᠤᠯ ᠮᠢᠨᠦ ᠰᠠᠷᠠᠨ ᠲᠡᠷᠭᠡᠯ ᠵᠡᠭᠦᠳᠦ︕      ᠬᠤᠭᠤᠷ ᠤᠨ ᠬᠤᠶᠠᠷᠬᠠᠨ ᠬᠢᠯᠭᠠᠰᠤᠨ ᠢᠶᠠᠷ ᠬᠤᠷᠮᠤᠰᠳᠠ ᠶᠢᠨ ᠲᠡᠭᠷᠢᠯᠢᠭ ᠠᠶᠠᠯᠭᠤᠨ ᠢ ᠴᠢᠪᠬᠠᠳᠠᠨ ᠲᠠᠭᠤᠯᠠᠬᠤ ᠮᠤᠩᠭᠤᠯ ᠤᠳᠤᠮ ᠤᠨ ᠮᠤᠷᠢᠳᠠᠢ ᠦᠯᠢᠭᠡᠷ ᠢᠶᠠᠨ ᠦᠷᠭᠦᠯᠵᠢᠯᠡᠨ ᠭᠦᠭᠯᠡᠭᠦ ᠪᠤᠯ ᠮᠢᠨᠦ ᠤᠳᠤᠨ ᠬᠢᠯᠪᠠᠭᠠᠳᠤ ᠢᠷᠡᠭᠡᠳᠦᠢ︕      ᠠᠷᠤ ᠲᠡᠭᠷᠢ ᠶᠢᠨ ᠲᠠᠯᠪᠠᠭ᠎ᠠ ᠪᠤᠯᠤᠬᠰᠠᠨ ᠠᠵᠠ ᠶᠢᠨ ᠲᠤᠯᠤᠭᠠᠨ ᠤᠳᠤᠨ ᠤ ᠲᠤᠭ᠎ᠠ ᠪᠠᠷ ᠲᠤᠬᠢᠶᠠᠬᠰᠠᠨ ᠡᠭᠡᠰᠢᠭ ᠲᠤᠯᠤᠭᠠᠨ ᠦᠰᠦᠭ ᠲᠠᠢ ᠡᠷᠳᠡᠨᠢ ᠶᠢᠨ ᠭᠡᠯᠡ᠂ ᠡᠨᠡ ᠲᠡᠯᠡᠭᠡᠢ ᠳᠤ ᠦᠭᠡᠷ᠎ᠡ ᠪᠠᠶᠢᠳᠠᠭ ᠤᠤ︖      ᠬᠤᠷᠢᠨ ᠲᠦᠷᠪᠡᠨ ᠴᠠᠭ ᠤᠨ ᠤᠯᠠᠷᠢᠯ ᠢᠶᠠᠷ ᠬᠠᠭᠤᠴᠢᠨ ᠶᠠᠭᠤᠮ᠎ᠠ ᠤᠯᠠ ᠪᠤᠯᠵᠦ᠂ ᠰᠢᠨ᠎ᠠ ᠶᠠᠭᠤᠮ᠎ᠠ ᠵᠤᠯᠠ ᠪᠤᠯᠵᠦ ᠬᠤᠪᠢᠷᠠᠨ ᠤᠯᠠᠷᠢᠬᠤ ᠰᠢᠳᠢ ᠶᠢ ᠬᠠᠷᠠᠭᠤᠯᠤᠬᠰᠠᠨ ᠬᠤᠷᠢᠨ ᠲᠦᠷᠪᠡᠨ ᠭᠡᠶᠢᠭᠦᠯᠦᠭᠴᠢ ᠲᠠᠢ ᠬᠤᠪᠢᠯᠭᠠᠨ ᠪᠢᠴᠢᠭ ᠬᠤᠷᠸ᠎ᠠ ᠳᠤ ᠯᠠᠪᠳᠠᠢ ᠬᠤᠶᠠᠷ ᠤᠯᠳᠠᠬᠤ ᠦᠭᠡᠢ᠃      ᠡᠭᠡᠰᠢᠭ ᠭᠡᠶᠢᠭᠦᠯᠦᠭᠴᠢ ᠶᠢᠨ ᠲᠤᠭ᠎ᠠ ᠨᠡᠶᠢᠯᠡᠭᠡᠳ ᠶᠡᠭᠡ ᠰᠠᠷ᠎ᠠ ᠶᠢᠨ ᠭᠤᠴᠢᠨ ᠨᠢᠭᠡᠨ ᠡᠳᠦᠷ ᠤᠨ ᠦᠯᠵᠡᠢ ᠪᠦᠷᠢᠳᠦᠭᠰᠡᠨ ᠭᠠᠶᠢᠬᠠᠮᠰᠢᠬᠳᠤ ᠭᠡᠯᠡ᠂ ᠦᠭᠡ ᠪᠠᠷ ᠭᠡᠯᠡᠵᠦ ᠪᠤᠯᠬᠤ ᠪᠦᠭᠦᠨ ᠢ ᠦᠰᠦᠭ ᠢᠶᠠᠷ ᠲᠤᠤᠷ᠎ᠠ ᠪᠠᠨ ᠪᠢᠴᠢᠭᠯᠡᠵᠦ ᠴᠢᠳᠠᠬᠤ ᠲᠡᠭᠷᠢ ᠭᠠᠵᠠᠷ ᠤᠨ ᠲᠤᠮᠳᠠ ᠲᠡᠮᠦᠵᠢᠨ ᠤ ᠭᠠᠭᠴᠠᠬᠠᠨ ᠮᠤᠩᠭᠤᠯ ᠪᠢᠴᠢᠭ ᠪᠤᠰᠤᠭ᠎ᠠ ᠪᠢᠴᠢᠭᠳᠡᠳᠡᠭ ᠨᠢ ᠬᠤᠷᠸ᠎ᠠ ᠶᠢᠨ ᠭᠠᠶᠢᠬᠠᠮᠰᠢᠭ᠃      ᠡᠨᠡ ᠰᠠᠶᠢᠬᠠᠨ ᠡᠷᠳᠡᠨᠢ ᠶᠢᠨ ᠪᠢᠴᠢᠭ ᠢ ᠡᠭᠦᠰᠭᠡᠨ ᠵᠤᠬᠢᠶᠠᠯᠭᠠᠬᠰᠠᠨ ᠡᠵᠡᠨ ᠪᠤᠬᠳᠠ ᠶᠢᠨ ᠭᠡᠭᠡᠨ ᠰᠦᠨᠡᠰᠦᠨ  ᠳᠤ ᠡᠳᠦᠷ ᠪᠦᠷᠢ ᠶᠢᠨ ᠨᠠᠷᠠᠨ ᠰᠠᠷᠠᠨ ᠢᠶᠠᠷ ᠡᠷᠳᠡᠯᠡᠵᠦ ᠤᠷᠤᠶᠢᠯᠠᠨ ᠮᠦᠷᠭᠦᠵᠦ ᠪᠠᠶᠢᠮᠠᠷ︕      ᠬᠠᠭᠠᠨ ᠴᠢᠩᠬᠢᠰ ᠤᠨ ᠠᠯᠳᠠᠨ ᠤᠷᠳᠤ ᠳᠤ ᠬᠠᠳ ᠭᠦᠪᠡᠭᠦᠳ ᠤᠨ ᠠᠩᠬᠠᠨ ᠤ ᠬᠢᠴᠢᠶᠡᠯ ᠢ ᠰᠢᠪᠰᠢᠵᠦ ᠪᠠᠶᠢᠬᠰᠠᠨ ᠲᠠᠳᠠᠳᠤᠩᠭ᠎ᠠ ᠪᠠᠭᠰᠢ ᠶᠢᠨ ᠲᠠᠷᠬᠠᠨ ᠭᠠᠪᠢᠶ᠎ᠠ ᠶᠢ ᠲᠠᠶᠠᠭᠠᠷ ᠲᠦᠮᠡᠨ ᠳᠤ ᠠᠯᠳᠠᠷᠰᠢᠭᠤᠯᠤᠨ ᠲᠤᠷᠠᠳᠬᠠᠵᠦ ᠪᠤᠯᠤᠮᠠᠷ᠃      ᠮᠠᠨᠳᠤᠬᠰᠠᠨ ᠲᠦᠷᠦ ᠶᠢᠨ ᠰᠤᠳᠤᠷ ᠲᠡᠮᠳᠡᠭᠯᠡᠯ ᠳᠤ ᠫᠠᠭᠪᠠ ᠯᠠᠮᠠ ᠶᠢᠨ ᠲᠦᠷᠪᠡᠯᠵᠢᠨ ᠦᠰᠦᠭ ᠤᠨ ᠤᠷᠤ ᠮᠦᠷ ᠲᠠᠢ᠃      ᠮᠠᠨᠠᠨ ᠪᠤᠳᠠᠩᠳᠤ ᠭᠦᠭᠡᠨᠠᠭᠤᠷ ᠤᠶᠢᠷᠠᠳ ᠲᠤ ᠽᠠᠶ᠎ᠠ ᠪᠠᠨᠳᠢᠳᠠ ᠶᠢᠨ ᠲᠤᠳᠤ ᠦᠰᠦᠭ ᠤᠯᠠᠮᠵᠢᠯᠠᠯ ᠲᠠᠢ᠃      ᠬᠠᠯᠬ᠎ᠠ ᠮᠤᠩᠭᠤᠯ ᠳᠤ ᠦᠨᠳᠦᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠤᠨ ᠠᠯᠳᠠᠨ ᠰᠤᠶᠤᠩᠪᠤ ᠬᠢᠯᠪᠠᠭ᠎ᠠ ᠲᠠᠢ᠃      ᠬᠠᠷᠠᠴᠢᠨ ᠤᠪᠤᠭ ᠤᠨ ᠠᠶᠤᠰᠢ ᠭᠦᠤᠰᠢ ᠶᠢᠨ ᠠᠯᠢ ᠭᠠᠯᠢ ᠶᠢᠨ ᠤᠯᠪᠠᠭ᠎ᠠ ᠲᠠᠢ᠃      ᠬᠤᠷᠢ ᠪᠤᠷᠢᠶᠠᠳ ᠤᠨ ᠸᠠᠬᠢᠨᠳᠠᠷ᠎ᠠ᠂ ᠬᠤᠪᠢᠰᠬᠠᠯᠴᠢ ᠲᠠᠮᠳᠢᠨᠰᠦ᠋ᠷᠦᠩ ᠤᠨ ᠺᠠᠷᠢᠯ ᠦᠰᠦᠭ ᠤᠳᠤ ᠪᠤᠯᠳᠠᠯ᠎ᠠ ᠤᠷᠤᠰᠢᠯ ᠲᠠᠢ᠃      ᠨᠡᠭᠦᠳᠡᠯ ᠰᠤᠶᠤᠯ ᠤᠨ ᠤᠯᠠᠨ ᠭᠡᠯᠪᠡᠷᠢ ᠶᠢ ᠵᠢᠷᠤᠬᠯᠠᠬᠰᠠᠨ ᠠᠮᠢᠳᠤ ᠭᠡᠯᠡᠨ ᠤ ᠲᠠᠮᠳᠡᠭ ᠨᠦᠭᠦᠳ᠂ ᠨᠦᠷᠢ ᠶᠡᠭᠡ ᠭᠦᠳᠡᠯᠮᠦᠷᠢ ᠳᠤ ᠤᠨᠴᠠ ᠶᠢᠨ ᠲᠦᠭᠡᠮᠡᠯ ᠲᠡᠯᠭᠡᠷᠡᠭᠰᠡᠨ ᠤᠶᠢᠭᠤᠷᠴᠢᠨ ᠮᠤᠩᠭᠤᠯ ᠦᠰᠦᠭ ᠮᠢᠨᠢ ᠪᠤᠰᠤᠭ᠎ᠠ ᠭᠡᠶᠢᠮᠦᠷᠢ  ᠪᠠᠨ ᠲᠠᠷᠬᠠᠯᠠᠬᠰᠠᠨ᠃      ᠤᠩᠰᠢᠬᠤ ᠳᠤ ᠭᠦᠳᠡᠭᠡ ᠶᠢᠨ ᠴᠡᠪᠡᠷ ᠠᠭᠠᠷ ᠰᠢᠭ᠋ ᠠᠭᠤᠵᠢᠮ ᠠᠮᠢᠰᠬᠤᠯᠳᠤ ᠡᠭᠡ ᠭᠡᠯᠡ᠂ ᠤᠶᠠᠩᠭᠠᠯᠠᠬᠤ ᠳᠤ ᠭᠦᠭᠵᠢᠮ ᠤᠨ ᠲᠦᠯᠬᠡᠨ ᠠᠶᠠᠰ ᠰᠢᠭ᠋ ᠭᠦᠩᠭᠡᠨ ᠴᠢᠯᠦᠭᠡᠳᠦ ᠡᠷᠳᠡᠨᠢ ᠶᠢᠨ ᠭᠡᠯᠡ᠃ ᠪᠢᠴᠢᠭᠯᠡᠭᠦ ᠳᠤ ᠤᠷᠤᠰᠤᠮ᠎ᠠ ᠲᠤᠳᠤᠷᠬᠠᠢ ᠤᠭᠠᠯᠵᠠᠨ ᠭᠡ ᠲᠠᠢ ᠵᠠᠯᠭᠠᠮᠠᠯ ᠦᠰᠦᠭ᠂ ᠪᠢᠰᠢᠷᠡᠭᠦ ᠳᠤ ᠪᠤᠰᠤᠭ᠎ᠠ ᠵᠤᠷᠢᠭ ᠤᠨ ᠵᠤᠬᠰᠤᠭ᠎ᠠ ᠭᠡᠶᠢᠮᠦᠷᠢ  ᠲᠠᠢ ᠲᠡᠭᠷᠢᠯᠢᠭ ᠪᠢᠴᠢᠭ᠂ ᠮᠢᠨᠦ ᠮᠤᠩᠭᠤᠯ ᠭᠡᠯᠡ︕      ᠡᠨᠡ ᠠᠭᠤᠤ ᠮᠤᠩᠭᠤᠯ ᠭᠡᠯᠡ ᠪᠠᠷ ᠢᠶᠠᠨ ᠪᠢᠳᠡ ᠡᠷᠭᠡ ᠴᠢᠯᠦᠭᠡᠳᠦ ᠠᠮᠢᠳᠤᠷᠠᠯ᠂ ᠡᠪ ᠬᠠᠮᠳᠤ ᠶᠢᠨ ᠠᠤᠭ᠎ᠠ ᠭᠦᠰᠡᠯᠡᠩ ᠢᠶᠠᠨ ᠮᠠᠬᠳᠠᠨ ᠲᠠᠭᠤᠯᠠᠨ᠎ᠠ᠃      ᠡᠨᠡ ᠠᠭᠤᠤ ᠮᠤᠩᠭᠤᠯ ᠪᠢᠴᠢᠭ ᠢᠶᠠᠷ ᠢᠶᠠᠨ ᠪᠢᠳᠡ᠂ ᠬᠤᠶᠢᠴᠢ ᠦᠶ᠎ᠡ ᠶᠢᠨ ᠬᠢᠨ᠂ ᠬᠤᠵᠢᠮ ᠢᠷᠡᠭᠡᠳᠦᠢ᠂ ᠬᠤᠷᠸ᠎ᠠ ᠶᠢᠨ ᠰᠠᠶᠢᠨ ᠰᠠᠶᠢᠬᠠᠨ ᠢ ᠪᠠᠭ᠋ᠠᠳᠤᠨ ᠤᠶᠠᠩᠭᠠᠯᠠᠨ᠎ᠠ᠃      ᠡᠶᠢᠮᠦ ᠡᠷᠬᠢᠮᠰᠦᠭ ᠲᠡᠭᠡᠳᠦ ᠭᠡᠯᠡ ᠰᠤᠶᠤᠯ ᠢᠶᠠᠨ ᠭᠦᠨᠳᠦᠳᠭᠡᠭᠦ ᠦᠭᠡᠢ ᠪᠤᠯ ᠪᠢᠳᠡ ᠡᠪᠦᠭᠡ ᠲᠡᠭᠡᠳᠦᠰ ᠤᠨ ᠰᠢᠷᠭᠠᠭᠤ ᠭᠦᠳᠡᠯᠮᠦᠷᠢ ᠳᠤ ᠤᠰᠤᠯᠳᠠᠵᠦ᠂ ᠡᠨᠡ ᠪᠡᠶ᠎ᠡ ᠶᠢᠨ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭ᠎ᠠ ᠪᠠᠨ ᠠᠯᠳᠠᠬᠤ ᠪᠤᠯᠤᠨ᠎ᠠ᠃      ᠡᠶᠢᠮᠦ ᠤᠳᠬ᠎ᠠ ᠲᠡᠭᠦᠯᠳᠡᠷ ᠤᠤᠭᠠᠯ ᠰᠤᠶᠤᠯ ᠢᠶᠠᠨ ᠬᠠᠶᠢᠷᠠᠯᠠᠬᠤ ᠦᠭᠡᠢ ᠪᠤᠯ ᠪᠢᠳᠡ ᠠᠷᠢᠭᠤᠨ ᠮᠤᠩᠭᠤᠯ ᠴᠢᠰᠤᠨ ᠳᠠᠭᠠᠨ ᠤᠰᠤᠯᠳᠠᠵᠦ᠂ ᠠᠭᠤᠤ ᠦᠨᠳᠦᠰᠦᠳᠡᠨ ᠤ ᠠᠯᠳᠠᠷ ᠭᠦᠨᠳᠦ ᠶᠢ ᠭᠤᠳᠤᠭᠠᠬᠤ ᠪᠤᠯᠤᠨ᠎ᠠ᠃      ᠭᠡᠯᠡ ᠰᠤᠶᠤᠯ ᠢᠶᠠᠨ ᠭᠦᠨᠳᠦᠳᠭᠡᠵᠦ᠂ ᠭᠡᠷᠡᠭᠯᠡᠵᠦ ᠲᠡᠯᠭᠡᠷᠡᠭᠦᠯᠭᠦ ᠳᠤ ᠬᠢᠴᠢᠶᠡᠩᠭᠦᠢ ᠬᠠᠨᠳᠤᠵᠦ᠂ ᠦᠭᠡ ᠪᠠᠨ ᠴᠡᠪᠡᠷ ᠶᠠᠷᠢᠨ᠂ ᠦᠰᠦᠭ ᠢᠶᠠᠨ ᠵᠦᠪ ᠪᠢᠴᠢᠵᠦ ᠰᠤᠷᠬᠤ ᠪᠤᠯ ᠭᠦᠮᠦᠨ ᠪᠦᠭᠦᠨ ᠤ ᠴᠢᠷᠮᠠᠶᠢᠨ ᠪᠡᠶᠡᠯᠡᠭᠦᠯᠭᠦ ᠦᠩᠭᠡ ᠭᠡᠷᠡᠯᠳᠦ ᠠᠵᠢᠯᠯᠠᠭ᠎ᠠ ᠶᠤᠮ᠃      ᠭᠠᠶᠢᠬᠠᠮᠰᠢᠬᠳᠤ ᠮᠤᠩᠭᠤᠯ ᠰᠤᠶᠤᠯ ᠢᠶᠠᠨ ᠭᠡᠰᠡᠨ ᠭᠠᠭᠴᠠ ᠦᠵᠦᠭᠦᠷᠳᠦ ᠰᠡᠳᠬᠢᠯ ᠢᠶᠠᠷ ᠵᠢᠳᠭᠦᠵᠦ᠂ ᠭᠠᠳᠠᠭᠠᠳᠤ ᠲᠤᠳᠤᠭᠠᠳᠤ ᠶᠢᠨ ᠭᠠᠷᠮᠠᠭᠠᠢ ᠠᠪᠢᠶᠠᠰᠳᠠᠨ ᠪᠦᠭᠦᠳᠠ ᠪᠤᠰᠤᠭ᠎ᠠ ᠮᠤᠩᠭᠤᠯ ᠦᠰᠦᠭ ᠤᠨ ᠲᠤᠤᠷ᠎ᠠ ᠵᠤᠬᠰᠤᠭ᠎ᠠ ᠪᠠᠷ ᠨᠠᠮᠠᠨᠴᠢᠯᠠᠬᠤ ᠪᠤᠯᠤᠬᠰᠠᠨ ᠴᠠᠭ ᠲᠤ ᠲᠡᠯᠡᠭᠡᠢ ᠲᠠᠢ ᠬᠠᠮᠳᠤ ᠲᠡᠯᠭᠡᠷ ᠵᠢᠷᠭᠠᠯᠠᠩ ᠢᠶᠠᠷ ᠪᠠᠶᠠᠰᠤᠶ᠎ᠠ ᠪᠢᠳᠡ︕      ᠠᠷᠤ ᠲᠡᠭᠷᠢ ᠶᠢᠨ ᠲᠠᠯᠪᠠᠭ᠎ᠠ ᠪᠤᠯᠤᠬᠴᠢ      ᠠᠰᠢᠳᠠ ᠶᠢᠨ ᠲᠤᠬᠢᠭᠤᠷ ᠤᠳᠤᠨ ᠳᠤ ᠲᠤᠬᠢᠶᠠᠬᠰᠠᠨ      ᠠᠪᠤ ᠰᠢᠭ᠋ ᠴᠠᠭᠠᠨ ᠲᠤᠯᠤᠭᠠᠢ ᠲᠠᠢ      ᠠᠷᠢᠭᠤᠨ ᠲᠤᠯᠤᠭᠠᠨ ᠡᠭᠡᠰᠢᠭ ᠮᠢᠨᠢ      ᠡᠯᠢᠭᠡ ᠵᠢᠷᠦᠭᠡᠨ ᠤ ᠬᠤᠷᠤᠢ ᠬᠤᠷᠤᠢ      ᠡᠭᠡᠰᠢᠭ ᠭᠡᠶᠢᠭᠦᠯᠦᠭᠴᠢ ᠡᠷᠳᠡᠨᠢ ᠮᠢᠨᠦ      ᠬᠤᠪᠢᠰᠬᠤ ᠤᠯᠠᠷᠢᠬᠤ ᠰᠢᠳᠢ ᠤᠷᠤᠰᠢᠬᠴᠢ      ᠬᠤᠷᠢᠨ ᠲᠦᠷᠪᠡᠨ ᠴᠠᠭ ᠢ ᠡᠵᠡᠯᠡᠭᠰᠡᠨ      ᠬᠤᠪᠢᠯᠭᠠᠬᠤ ᠪᠦᠳᠦᠭᠡᠭᠦ ᠶᠤᠰᠤᠨ ᠲᠡᠭᠦᠯᠳᠡᠷ      ᠬᠤᠷᠢᠨ ᠲᠦᠷᠪᠡᠨ ᠭᠡᠶᠢᠭᠦᠯᠦᠭᠴᠢ ᠮᠢᠨᠢ      ᠡᠴᠢᠭᠡ ᠲᠡᠭᠡᠳᠦ ᠶᠢᠨ ᠬᠤᠷᠤᠢ ᠬᠤᠷᠤᠢ      ᠡᠭᠡᠰᠢᠭ ᠭᠡᠶᠢᠭᠦᠯᠦᠭᠴᠢ ᠡᠷᠳᠡᠨᠢ ᠮᠢᠨᠦ      ᠶᠠᠷᠢᠬᠤ ᠪᠤᠯᠭᠠᠨ ᠢ ᠪᠢᠴᠢᠨ ᠴᠢᠳᠠᠬᠴᠢ      ᠢᠷᠡᠭᠤ ᠰᠤᠨᠤᠰᠬᠤᠯᠠᠩ ᠠᠶᠢᠵᠠᠮ ᠭᠦᠪᠦᠷᠡᠭᠰᠡᠨ      ᠢᠯᠠᠭᠤᠬᠰᠠᠨ ᠮᠤᠩᠭᠤᠯ ᠤᠨ ᠪᠤᠰᠤᠭ᠎ᠠ ᠲᠤᠩᠬᠠᠭ      ᠢᠮᠠᠬᠳᠠ ᠰᠢᠳᠦᠭᠦ ᠵᠤᠬᠰᠤᠭ᠎ᠠ ᠵᠠᠷᠯᠢᠭ      ᠡᠵᠡᠨ ᠲᠡᠭᠷᠢ ᠶᠢᠨ ᠬᠤᠷᠤᠢ ᠬᠤᠷᠤᠢ      ᠡᠭᠡᠰᠢᠭ ᠭᠡᠶᠢᠭᠦᠯᠦᠭᠴᠢ ᠡᠷᠳᠡᠨᠢ ᠮᠢᠨᠦ      ᠶᠡᠭᠡ ᠴᠢᠩᠭᠢᠰ ᠤᠨ ᠲᠠᠶᠢᠯᠠᠨ ᠲᠠᠭᠠᠭᠤᠯᠤᠬᠴᠢ      ᠶᠢᠷᠳᠢᠨᠴᠦ ᠶᠢᠨ ᠲᠦᠮᠡᠨ ᠤ ᠲᠠᠭᠠᠨ ᠰᠢᠪᠰᠢᠭᠰᠡᠨ      ᠬᠠᠳᠠᠨ ᠳᠤ ᠰᠡᠶᠢᠯᠦᠭᠰᠡᠨ ᠬᠠᠭᠠᠨ ᠦᠰᠦᠭ        ᠬᠠᠰᠪᠤᠤ ᠲᠠᠮᠠᠭᠠᠨ ᠤ ᠨᠤᠶᠠᠨ ᠵᠡᠪᠰᠡᠭ      ᠡᠷᠭᠡᠰ ᠤᠷᠴᠢᠯᠠᠩ ᠤᠨ ᠬᠤᠷᠤᠢ ᠬᠤᠷᠤᠢ      ᠡᠭᠡᠰᠢᠭ ᠭᠡᠶᠢᠭᠦᠯᠦᠭᠴᠢ ᠡᠷᠳᠡᠨᠢ ᠮᠢᠨᠦ︕
 
ᠢᠷᠡᠯᠲᠡ᠄ ᠬᠤᠯᠪᠤᠭ᠎ᠠ ᠪᠦᠷᠭᠡ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠤᠷᠠᠳᠴᠤᠳ ᠤᠨ ᠠᠩ ᠤᠨ ᠰᠤᠶᠤᠯ
ᠮᠤᠩᠭᠤᠯ ᠦᠰᠦᠭ ᠪᠢᠴᠢᠭ ᠤᠨ ᠤᠤᠭᠠᠨ ᠮᠦᠽᠸᠢ
ᠬᠦᠷᠦ ᠲᠠᠭᠤᠤ ᠶᠢᠨ ᠤᠯᠠᠮᠵᠢᠯᠠᠯ ᠪᠠ ᠬᠦᠭᠵᠢᠯᠲᠡ
ᠤᠯᠠᠮᠵᠢᠯᠠᠯᠳᠤ ᠲᠠᠪᠤᠨ ᠦᠶ᠎ᠡ ᠶᠢᠨ ᠵᠠᠩᠭ᠎ᠠ ᠶᠢᠨ ᠤᠯᠠ ᠮᠦᠷ
ᠵᠠᠷᠣᠳ ᠣᠪᠤᠭ᠎ᠠ ᠶᠢᠨ ᠲᠤᠮᠤᠭ—ᠬᠠᠶᠢᠷᠬᠠᠨ ᠬᠠᠨ ᠠᠭᠤᠯᠠ ᠣᠪᠤᠭ᠎ᠠ ᠶᠢᠨ ᠲᠤᠮᠤᠭ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号